خـارج الـسـرب / ثـامـر شـبـيـب

خـارج الـسـرب / ثـامـر شـبـيـب

شاعرنا لايحتاج مقدمات

تقبلوه كما هو

سلامتكـ 1

سلامتك والله يحفظك ويبقيك
ويقبل دعاتك في صلاتك وصومك

ياجعلني ماذوق حزنك ولا ابكيك
يافرحة سنيني عسى الله يدومك

ليت التعب فيني حبيبي ولا فيك
وياليت يومي ينتهي قبل يومك

ودي اضم ايديك واقبل ايديك
وفرش لك ذراعي مخده لنومك

وان قمت من نومك وعيني تراعيك
سولف عن احلامك وعطني علومك

استأذنك لحظه دقايق بخليك
بروح ابشر عالمي في قدومك

في غيبتك احلم اشوفك واحاكيك
سمتني الدنيا بعدك محرومك

ياما تخيلتك بدربي واناديك
واقول : وشفيها تردت عزومك

لك وقت متغير على قلب مغليك
ماكنه الي شال عنك همومك

ابيع من عمري على الناس واشريك
لو باعتك دنياك مارخصت سومك

ماهو على شانك على شان ماضيك
مهما تسوي اعذرك ما الومك

هذا خيالي كل ما مر طاريك
والا الحقيقه عايش ارجي غيومك

اضحك على نفسي اذا قلت مابيك
انت القمر والناس هذي نجومك

حببتني في كل حاجه حواليك
مانيب من قومك واحامي لقومك

ماقول غير الله يحفظك ويبقيك
وياجعل يومي ينتهي قبل يومك

وغلات ثامر شبيبـ2

أمانة أمك .. وأبوك .. وخالك .. و عمك
أو تدري ..؟؟ اسمع حبيبي ( بيتي الثاني )

وغلات ( ثامر شبيب ) إن كانه يهمك ..؟
ارجع عشان الغلا .. ولا على شاني

ياما تحملت .. حزنك .. ضيقتك .. همك
تعال اخذني من الضيقات وأحزاني

لا مر طيفك ؟ أضمه كني أضمك
الوقت بعدك .. كسر قلبي .. و بكاني

دمي وأحسه مشى في داخله دمك
لو كان ما تلحقك جدان جداني

حبيت أنا (أمك) .. عشان (محبتك لأمك)
لولاك ..؟؟ ما مر طاريها على لساني

كلمة ( أحبك ) صداها غير من فمك
اتصدق..؟؟ (اسمع صداها) وسط وجداني ..!!

ناديتك ف ( بيتي الثاني ) وأنا يمك
قطعت صوتي على صوتك ولا جاني

لكن وصاتي ..؟؟ قبل فرقاك (بلمك)
وأهديك ( بيت النهاية ) واترك الثاني

حبيت أعلمك (حاجه) يمكن تهمك ..؟
أنت (أول إنسان حبيته وخلاني) ..!!

منت اختياريـ3

تعال وارسم على وجه الزمن بسمه
تعبت من دنيتن فيها الحزن ضيفي

القلب ضاق بجفاك ومل من جسمه
صبرت لين الجفا كسر مجاديفي

صورتك بين الجفن والعين منرسمه
مسهرني طيفك ورى مايسهرك طيفي ؟

احس بحساس صوبك ماعرف شسمه
بس اعرف انه يجيب اشتاي في صيفي

يرضيك اناابكي عليك ان هبت النسمه
وانا الزمن مافرح لحظه بتخويفي

سيفي اخذ من زمانه حقه وقسمه
ومن شفت سهم الهدب سلمت لك سيفي

وان عودت للغلا لا تخاف منحسمه
ركز معي !! وانتبه ؟؟ واسمع لتوصيفي :

غلاك عانه وسم في داخلي وسمه
مكتوب فوق الوسم : (اغلا مواليفي)

منت اختياري ولكن صرت لي قسمه
الله كتب لي احبك ماهو بكيفي

متى على الله ترد وترجع البسمه
مليت من دنيتن فيها الحزن ضيفي

اسكتـ4

آسكت و خل السوالف للغلا و الحنان
آشتاق .. لا والله إلا آموت لامن طرت

من قال وشلون حالك ؟! قلت طيب و زان
و آنا جروحي تزيد مع الزمن مابرت !

تخيل آنك كبير و لك معزه و شان
إيدك على مدة الخيرات مبطي ضرت

لكن عرفت الليال السود ، و الفقر بان
جرت لك ايام مامرت عليك وجرت

مكانك إللي قبل ملفى الرجاجيل كان
يمر دربه إدباك آقدامها مادرت

خلوك ضايق من الدنيا بنفس المكان !!
قدام عينك تشاهد / و الركايب سرت

بالضبط هذا شعوري يوم قفت عشان .....
تحضر زفافه عليها ! وليتها ماحضرت

آسف إذا قلت شي و حسسك بالهوان ؟!
كاسرني الحب مدري هي فيه كسرت ؟

آبكي عليها و آنا ماني ردي و جبان
آنا آذكر آيامها مهما نست ماذكرت

متعود آسهر معااااها من 3 ل 8
و تضيق و تزعل علي آن نمت ليل سهرت

و اللحين مدري من إللي فيه لياليه خااااان
آخير ماذكر كلام القلب وقت هجرت

مع السلامه ،، ب حفظ الله ياعمري ( فمان )
( الله ) لو آن المصايب من بعدها كثرت

إن جاك منهو يقول الوقت ماله آمان ..
قول البشر للآسف باعت قلوب و شرت !

الناس متغيره ؟ ولا الزمان الزمان !
وجه الزمن ماغدرك .. الناس فيك غدرت !!!

شفني قبل كنت قاسي طبع / واللحين لان
سوالفي عنّها صبرتها ،، ماصبرت !

نشرت قلبي قصايد من مكان ل مكان
يمكن تحس ب خطاها ؟ بالقصيد إن قرت

فرقا عمر5

ياورد تذكر من على كفها تلين
ان مرتك تروي ضماك السواقي

تذكر هذيك اللي لها عروق قلبين
اللي دفاها مرتبط بحتراقي

اللي تجي قبل اسأل اطيوفها وين
دايم تحاتي لوعتي واشتياقي

البارحه في صمت غابت عن العين
راحت وخلت جرح الايام باقي

فارقتها فرقا ماهي بس يومين
فرقا عمر ماعاد فيها تلاقي

ماني بشايل همها الا بثنتين
الكل منهن مر يالله تاقي

خايف على فرقاي ماتصبر سنين
والخوف الاكبر كان عادي افراقي

هقيت بأيام العمر خير بعدين
اكذب عليك ان قلت ماكنت هاقي

في درب جاني منين او جيته منين
مشيت لكنه ثنا البعد ساقي

ماعاد انا فاهم ولاشي هالحين
بس فاهم اني للمتاهات راقي

راقي لا والله نازل وخاطري شين
الله يهدي روعتي واختناقي

لو نفترض القا مثل زينها زين
بنت اتحدا في سهرها اعناقي

المشكله القا مثل قلبها وين
صدقني راح اموت ماني بلاقي

شيخة العوبـ6

كل البشر في صوب وهالبنت في صوب
الكامل الله كامله ماتعابي

ترفه وهي تمشي مسافات ودروب
في عز رحلات الشقى والعذابي

لامن مشت في يدها ترفع الثوب
كلٍ يناديها وهي تقول مابي

من الدلع سميتها شيخة العوب
حتى دلعها منحني له عجابي

مركوبها ماهوب أيات مركوب
من مر قدامي تلنه ركابي

لحقتها والهرج زاهب ومكتوب
لأي موقف كنت عامل حسابي

قلت السلام وردت بأيش مطلوب
قلت الخفوق بخفت الدم ذابي

قالت وش اللي حدك لناري تذوب
قلت المشاعر ماعليها عتابي

قالت تمثل دور عاشق ومحبوب
قلت الحقيقه افتديك بشبابي

قالت اخير الحب ناهب ومنهوب
قلت انهبيني قبل لانقل صوابي

قالت متى تكبر عن الحب وتوب
قلت الخبل من شاف زينك وتابي

قالت صراحه ماتوقعتك سلوب
قلت افهم انك معجبه في جوابي

فجأه عرض لي واحدٍ عرضت خروب
سلم علي وخاطر البنت طابي

جاني مطفي ضارب فياض وشطوب
ومن قو عينه قال يامرحبابي

واخذ يسولف لي وانا فيه مغصوب
يسئل عن احوالي وسبة غيابي

مايدري انه بعرضته كسر قلوب
لا واعذابي منه لا واعذابي

رقد على كبدي وانا بوقت محسوب
البنت راحت والرجى منه خابي

وقفت عاجز كني انسان مغلوب
من قرد حظي كل هذا جرابي

اتلا عهدها تلتفت لفت رعبوب
مالله كتبها قسمةٍ في كتابي

اقفت تمشى في مسافات ودروب
قلبي يناديها وهي تقول مابي

محتاج لك حيلـ7

محتاج لك حيل والله يقطع الحاجه
حدتني وجيت اداري دمعة عيوني

باين علي التعب والضيق وانتاجه
منهار لوني متغيّر ماهو بلوني

لقيتك .. اللي يصد معقد حجاجه
وانت اقرب الناس والغالي ومضنوني

لكن على الله بديه الضيق وافراجه
والا انت الله معك خابت بك ضنوني

بلاش منك ومن موقفك واحراجه
رح واتبع اللي خذوا مني وخلوني

من صد عني ترى مانيب محتاجه
من دونه اعيش دامه عاش من دوني

وان قدر الله مع الايام نتواجه
تمر مثلك مثل ناسن يمروني

في عيوني تصير ماتسوا ولا حاجه
من عقب ماكنت تسوا الناس في عيوني

مسكـ الختامـ

حاولت اغير فيك من كثر ماغليكـ8

البارحه مابين وشلون يمديك
في يوم واحد ياحبيبي تغيّّرت

الليل خلاني وخلا طواريك
تلعب بقلبي كل ماداخلي ثرت

سويت شين حدني غصب ماجيك
والا قبل لاسير الليل سيرت

هدمت كل اللي بنيت بتجافيك
هدمت لا والله بالعون دمرت

خليتني ماقلت لي شلون اخليك
ليتك بحالي قبل مارحت ناظرت

الله كريم يصبر اشواق مغليك
لاقام ينثرني غلاك وتناثرت

والله يسامح قلبي اللي مواليك
اخذت كل اللي تبي منه وانكرت

منهار جيت العام تسبق خطاويك
واليوم ماكنك قبل جيت وانهرت

في ذمتك لامن تذكرت ماضيك
من يطري في بالك اليامن تذكرت ؟

من كثر مافكرت وشلون اراضيك
وياك في نفسي ولا يوم فكرت

على كثر ماكنت متمسكن فيك
وعلى كثر ماحتجتني ماتعذرت

جيتك وعندي حاجتن بين اياديك
والمشكله تقدر عليها وقصرت

رح بشر اللي ملتفت لك يناديك
قله تركته لخاطرك ماتأخرت

صدقني انها غلطتي يوم اداريك
ولا انت لولا غلطتي كان ماصرت

كبرتك بعين البعيد وحواليك
ابيك تكبر والمصيبه تكبرت

حاولت اغيّّر فيك من كثر مغليك
قدرت لكنك عليّّه تغيّّرت

حاولت اغير فيك من كثر مغليك
قدرت..لاكنك عليه تغيرت [img:5c85]http://www.zgrty.com/vb/images/smilies/smile[1].gif[/img:5c85]
</B></I>

google_protectAndRun("ads_core.google_render_ad", google_handleError, google_render_ad);

الموضوع الأصلي : خـارج الـسـرب / ثـامـر شـبـيـب الكاتب : Abdulmoshin ALherz المصدر : منتدى فرسان التطوير

التوقيع توقيع Abdulmoshin ALherz